Rusiya Ukraynaya kütləvi raket hücumuna hazırlaşır – “Der Spiegel” peyk görüntülərini yaydı / FOTOLAR

“Rusiya Federasiyası Ukraynaya növbəti kütləvi raket zərbəsi endirməyə hazırlaşır, bunu Saratov yaxınlığında yerləşən Rusiyanın “Engels-2” aerodromunun peyk görüntüləri də təsdiqləyir”.

Qafqaz.media xəbər verir ki, bu barədə “Der Spiegel” nəşri yazır.

Qeyd edək ki, şəkillərdə iyirmiyə yaxın Tu-95 və T-160 bombardmançıları göstərilir.

“Bazada fəallıq çox yüksəkdir” deyən Türk hərbi analitik Arda Mövlutoğlunun sözlərinə görə, kadrlarda yanacaq çənləri, sursat qutuları, nəqliyyat vasitələri və təmir materialları da var.

Polşanın “Rochan Consulting” analitik mərkəzinin rəhbəri Konrad Muzyka da aerodromda döyüş hazırlığının artırılması ilə bağlı məlumatı təsdiqləyib:

“Çoxlu hərəkət var, təyyarələrə texniki xidmət göstərilir və təbii ki, onlar yeni əməliyyatlara hazırlaşırlar. Bundan əlavə, siz Kh-55 və ya Kh-101 qanadlı raketlərinin daşınması üçün istifadə olunan traktorları görə bilərsiniz”.

Analitiklərin fikrincə, “Engels-2” Rusiya Hərbi Hava Qüvvələrinin ən mühüm bazalarından biridir. Burada Rusiyanın havadan nüvə qarşısının alınması taktikasının tərkib hissəsi olan iki strateji bombardmançı alayı yerləşdirilib.

Fevral ayında Rusiya müharibənin başlanmasına hazırlıq məqsədilə aerodromda əlavə qırıcı təyyarələr yerləşdirib və o vaxtdan bu bazadan Ukraynada irimiqyaslı hava hücumları üçün istifadə edib.

Bir neçə gün əvvəl Ukrayna prezidenti Vladimir Zelenski Rusiyanın yeni raket zərbələri hazırladığını bildirib.

Öz növbəsində, Amerika Müharibənin Öyrənilməsi İnstitutu (ISW) də yeni raket hücumuna hazırlıq barədə yazıb.

Ukraynanın müdafiə naziri Aleksey Reznikovun sözlərinə görə, Rusiya son 9 ay ərzində Ukrayna ərazisinə 16 mindən çox raket zərbəsi endirib və Rusiya hədəflərinin 97%-i mülki obyektlərdir.

Milli Təhlükəsizlik və Müdafiə Şurasının katibi Aleksey Danilov bildirib ki, Rusiyanın Ukrayna ərazisinə növbəti üç-dörd kütləvi raket hücumuna qarşılıq verməyə kifayət qədər raketləri olacaq.

Britaniya kəşfiyyatının məlumatına görə, Rusiyanın Ukraynadakı genişmiqyaslı raket kampaniyasının effektivliyi getdikcə azalır, çünki Moskva müvafiq raket arsenalını demək olar ki, tükəndirib.

Qafqaz.media