Trampın yüksək vəzifə verdiyi türk görün kimdir - Maraqlı detallar

Xəbər verdiyimiz kimi, ABŞ-ın yeni seçilmiş prezidenti Donald Tramp federal səhiyyə xidmətləri olan “Medicare” və “Medicaid”-in direktoru vəzifəsinə həkim Mehmet Özün namizədliyini irəli sürdüyünü açıqlayıb. Publika.az xəbər verir ki, bu barədə Tramp “Truth Social” media platformasında açıqlama verib. O, açıqlamasında Özün Harvard Universiteti ilə başlayan təhsil həyatına və karyerasına toxunub. Həmçinin onun Amerika səhiyyə sistemində bir çox problemi həll edə biləcəyini vurğulayıb.

Mehmet Öz kimdir?

Mehmet Öz 11 iyun 1960-cı ildə atası Bozkır və Konya əsilli, həm də həkim olan Mustafa Özün işlədiyi Klivlenddə anadan olub. O, türk əsilli amerikalı həkim, aparıcı və siyasətçidir. “The Dr. Oz Show” televiziya proqramının aparıcısı olub. Kolumbiya Universitetinin sədr müavini və cərrahiyyə professoru olan Öz “New York Presbyterian” xəstəxanasında Ürək-Damar İnstitutu və Tamamlayıcı Tibb Proqramını idarə edir.

Öz 2021-ci ilin noyabrında 2022-ci il üçün Pensilvaniya ara seçkilərində Respublikaçılar Partiyasından senatorluğa namizəd olduğunu açıqlayıb. O, 17 may 2022-ci ildə keçirilən və sonradan yenidən hesablanacaq ilkin seçkiləri Devid MakKormikə qarşı təxminən 1000 səs fərqi ilə qazanaraq partiyasının senator namizədi olmağa vəsiqə əldə edib. O, həmçinin Harvard Universitetini bitirib. Onun klinik təcrübə sahələri minimal invaziv ürək cərrahiyyəsi, ürək qapağı və aorta cərrahiyyəsi, böyüklər üçün ürək transplantasiyası, mexaniki ürək yardımı və koronar şuntlama əməliyyatıdır. Mehmet Öz minimal invaziv ürək əməliyyatı, tamamlayıcı tibb, ürək baxımının nəticələrinin təhlili və ürəyin dəyişdirilməsi ilə bağlı araşdırmalar aparıb.

Şəxsi həyatı

Lisa Özlə evli olan Mehmet Özün Dəfnə Nur, Anabella Sezen, Zoe Yasemin və Oliver Mustafa adlı 4 övladı var. Mehmet Öz hazırda Kolumbiya Universiteti Tibb Mərkəzində Kardiologiya Direktorudur və karyerasını Kolumbiya Universitetinin Həkimlər və Cərrahlar Məktəbində cərrah olaraq davam etdirir.

Televizya proqramları və kitabları

"Həkim Özlə İkinci Bir Görüş" Discovery Health, "Həyat Cizgisi" Discovery Health, "Daily Rounds" Discovery Health, " Qidalar haqqında həqiqət” Discovery Health, "Live Transplant" Discovery Health, "National Body Challenge" Discovery Health, "Siz: Pəhrizdəsiniz" Discovery Health, "Həkim Özdən soruş" Oprah Winfrey Şousu.