Həkimlərə ard-arda hücum - Müraciət edildi: Xəstəxanaların mühafizəsi orduya tapşırılsın!

İtaliya səhiyyə işçiləri həkimlərə və tibb bacılarına qarşı bir sıra hücumlardan sonra hökuməti dövlət xəstəxanalarının mühafizəsini gücləndirməyə çağırıb.

Publika.az xəbər verir ki, bu barədə "Reuters" məlumat yayıb. Bildirilir ki, mübahisə İtaliyanın cənubundakı Foca şəhərində baş verən hadisədən sonra başlayıb, xəstəxana işçiləri əməliyyat zamanı ölən gənc qadının qəzəbli qohumlarından və dostlarından qaçmaq üçün otaqda barrikada qurmalı olublar. Xəstəxana işçilərinin qapını bağlamaq üçün divan və komodini itələdiyi görüntülər İtaliyada sosial mediada və onlayn nəşrlərdə geniş yayılıb. Qeyd olunur ki, o vaxtdan bəri Fociada eyni xəstəxanada daha iki insident baş verib: 18 yaşlı xəstə tibb bacısına hücum edib, xəstələrdən birinin oğlu isə iki tibb bacısını və mühafizəçini vurub. "Biz xəstəxanalarda tolerantlıq istəyirik. Biz istəyirik ki, ordu vətəndaşları başa salsın ki, həkimlər onların mühafizəsi altındadır", - deyə İtaliyanın Tibb Bacıları Milli Federasiyasının sədri Barbara Mangiakavalli bildirib. İtaliyanın Milli Həkimlər Federasiyasının prezidenti Filippo Anelli də ordunu xəstəxanaların mühafizəsinə cəlb etməyə çağırıb və Baş nazir Giorgia Melonidən xəstəxana təhlükəsizliyini yaxşılaşdırmaq üçün AB-nin COVID-19 fondlarından istifadə etməsini istəyib. İtaliyanın səhiyyə naziri Orazio Şillaçi son silsilə hadisələri biabırçı adlandırıb və onun müavini Marsello Gemmato belə cinayətlərin cəzasız qalmayacağını bildirib. Həkimlərin Həmkarlar İttifaqı sentyabrın 16-da Fociadakı hücumlara qarşı etiraz aksiyası keçirməyi planlaşdırır. Digər Avropa ölkələri kimi İtaliya da milli səhiyyə sistemində böhranla üzləşir. Kadr çatışmazlığı stresli iş şəraiti, aşağı əmək haqqı və dövlət xərclərinin məhdudlaşdırılması fonunda ildən-ilə daha da artır. İtaliya Səhiyyə Nazirliyinin məlumatına görə, 2023-cü ildə tibb işçilərinə qarşı 16 mindən çox hücum olub.