“DAHA SÜRƏTLİ, DAHA SÜRƏTLİ, DAHA SÜRƏTLİ” - Kiyev NATO-nu silah tədarükünü sürətləndirməyə çağırır

Ukraynanın xarici işlər naziri Dmitri Kuleba NATO ölkələrini tezliklə Ukraynaya silah göndərməyə və Qərbdə yeni silah istehsalı yaratmağa çağırıb.

Qafqaz.media xəbər verir ki, bu barədə o, Buxarestdə NATO-ya üzv ölkələrin nazirlərinin görüşü çərçivəsində NATO-nun baş katibi Yens Stoltenberqlə birgə brifinqdə bildirib.

Kuleba deyib ki, əvvəlki belə görüşdə onun üç əsas sözü “silahlar, silahlar, silahlar” olub. O vaxtdan bəri, onun sözlərinə görə, Ukrayna əhəmiyyətli yardım alıb və bu, Ukrayna Silahlı Qüvvələrinə ərazinin əhəmiyyətli hissəsini azad etməyə kömək edib.

“Bu gün mənim daha üç sözüm var – “daha ​​sürətli, daha sürətli və daha sürətli”. İndiyədək görülən işlərə görə minnətdarıq. Amma müharibə hələ də davam edir. Biz sübut etdik ki, birlikdə Rusiyaya qalib gələ bilərik, bütün Avro-Atlantik məkanın və bütün dünyanın maraqları naminə. Amma silahların verilməsi, Qərbdə müdafiə sənayesinin yeni istehsal güclərinin işə salınması ilə bağlı qərar daha tez verilməli, silah təchizatı da daha sürətli olmalıdır. Və bu barədə danışdıq ki, bütün bunları necə sürətləndirmək olar”, - Kuleba bildirib.

Qafqaz.media