“BƏSİC” ÜZVÜNÜN QƏTLİNDƏ İTTİHAM OLUNAN 5 NƏFƏR EDAM EDİLƏCƏK… - 27 yaşlı Əcəmiyanın ölümündə 15 nəfər günahkar bilinir
İranda ümummilli etirazlar zamanı “Bəsic” yarımhərbi qruplaşmasının üzvü Ruhullah Əcəmiyanı qətlə yetirən 5 nəfər edam cəzasına məhkum edilib.
Qafqaz.media xəbər verir ki, bu barədə çərşənbə axşamı məhkəmə hakimiyyətinin mətbuat katibi Məsud Setayeşi məlumat verib.
Daha 11 nəfər, o cümlədən üç uşaq uzun müddətə azadlıqdan məhrum edilib.
Ötən həftə Ədliyyə Nazirliyinin “Mizan Online” saytı Əcəmiyanın noyabrın 3-də Tehranın qərbində Kərəcdə ölümü ilə bağlı 15 nəfərin ittiham olunduğunu bildirib.
Prokurorlar bildiriblər ki, 27 yaşlı Əcəmiyan öldürülən etirazçı Hədis Nəcəfinin ölümünün 40-cı gününü qeyd etmək üçün toplaşan bir qrup etirazçı tərəfindən lüt soyundurularaq öldürülüb.
Nəcəfi kürd əsilli 22 yaşlı iranlı Məhsa Əmininin həbsdə öldürülməsindən sonra İranı bürümüş iğtişaşlar zamanı qətlə yetirilib. O, hicab geyinmədiyinə görə “əxlaq polisi” tərəfindən həbs edilib və daha sonra ölüb. Nümayişçilər buna döyülmənin səbəb olduğuna əmindirlər, baxmayaraq ki, səlahiyyətlilər ölümün infarkt səbəbindən baş verdiyini iddia edirlər.
15 nəfər qətldə ittiham olunur…
Noyabrın 12-də “Mizan Online” xəbər vermişdi ki, Əcəmiyanın qətli ilə bağlı 11 iranlı ittiham olunsa da, o vaxtdan bu rəqəm 15-ə çatıb.
“Bəsic” formal olaraq İslam İnqilabı Keşikçiləri Korpusunun bir hissəsidir, lakin praktikada bəzən yerli hakimiyyət orqanları tərəfindən idarə olunur. Təşkilat həm də sosial yardım göstərir, dini mərasimlər təşkil edir, siyasi əhval-ruhiyyə və əxlaqa nəzarət edir.
Dövlət mediasına görə, İslam İnqilabı Keşikçiləri Korpusu çərşənbə axşamı xarici agentlərlə əlaqədə olmaqda və "təxribat fəaliyyətləri" planlaşdırmaqda ittiham olunan 12 nəfəri də həbs edib.
"Almaniya və Hollandiyada yaşayan anti-inqilabçı agentlərin rəhbərlik etdiyi bu şəbəkənin üzvləri hərbi silahlar almaq və milli təhlükəsizliyə zidd hərəkətlər etməklə təxribatçı fəaliyyətlər həyata keçirmək niyyətində idilər", - SEPAH-ın bəyanatında deyilir.
Bəyanatda bu şəxslərin milliyyəti və digər təfərrüatlar göstərilmir.
Bazar ertəsi adı açıqlanmayan İran ordusu generalı ay yarımdır davam edən iğtişaşlarda təhlükəsizlik qüvvələrinin onlarla üzvü də daxil olmaqla 300-dən çox insanın həlak olduğunu bildirib.
40-ı əcnəbi və tanınmış aktyorlar, jurnalistlər və vəkillər də daxil olmaqla, yüzlərlə insan öldürülüb, minlərlə insan həbs edilib.
“Əxlaq polisi”nin aqibəti necə olacaq?
Bu arada, iranlılar və dünya ictimaiyyəti hicabların taxılmasına və geyimdə “təvazökarlıq” qanunlarına riayət olunmasına nəzarət edən “əxlaq polisi”nin buraxıldığını elan edən İran baş prokurorunun bəyanatlarını necə şərh edəcəyini anlamağa çalışır. Ertəsi gün dövlət mediası xəbər verdi ki, İran İslam Respublikasında heç bir rəsmi qurum müavini “əxlaq polisi”nin ləğv olunmasını təsdiqləməyib.
Qafqaz.media
