G7 Rusiya ilə əlaqələrə görə Çinin kiçik banklarını təhdid etməyi planlaşdırır

ABŞ rəsmiləri G7 ölkələrinin gələn həftə kiçik Çin banklarına Rusiyaya sanksiyalardan yayınma yardımını dayandırmaları üçün yeni, ətraflı xəbərdarlıq göndərəcəyini gözləyirlər.

APA xəbər verir ki, Rusiya və Çin arasında ikitərəfli münasibətlərin möhkəmləndirilməsi, xüsusilə də iki dövlət arasında artan ticarət dövriyyəsi təhlükəsinin İtaliyada keçiriləcək G7 sammitində əsas mövzulardan birinə çevriləcəyi gözlənilir.

ABŞ nümayəndələri Rusiya ilə maliyyə əməliyyatlarına xidmət etməyə davam edən Çin banklarına qarşı ən sərt tədbirlərə nail olmağa çalışırlar.

Onu da qeyd edək ki, ABŞ-ın bu mövqeyi bir sıra ölkələrdən dəstək görmür. Bununla belə, bu cür sanksiya tədbirlərinin qəbulu ehtimalı yalnız kiçik Çin banklarına təsir göstərə bilər ki, bu da Çinin iqtisadi sektorunun fəaliyyətinə ciddi təsir göstərməyəcək.

Xəbərdarlığın dəqiq formatı və məzmunu ilə bağlı danışıqlar, o cümlədən diplomatik münasibətlərlə bağlı müzakirələr davam edir.

Bundan əvvəl, iyunun 6-da Rusiya Federasiyasının Federal Gömrük Xidməti Rusiya Federasiyası ilə Çin arasında ticarət dövriyyəsinin yanvar-aprel ayları ərzində 7% artdığını bildirmişdi. Mayın əvvəlində Çin və Rusiya arasında ticarət dövriyyəsinin dörd ayda 4,7% artaraq 76,58 milyard dollar təşkil etdiyi bildirilirdi.