Bütün biləsuvarlılar onunla fəxr edəcəklər... - Elman Eldaroğlu yazır

Şeir yazmağa uşaq yaşlarından başlasa da, 2010-cu ildə nəşr olunan "Pərvanəm mənim" adlı ilk kitabı ilə poeziya aləmində tanınmağa başlayıb. Arzuladığı pilləyə hələ də yetişmədiyini düşündüyü üçün, həyatından elə də razı deyil...

"Bəlkə görüşmədik", "Dənizlə söhbət" adlı şeirlər kitabının müəllifidir.  Hətta bir insan həyatından, bir mahnıdan da təsirlənə bilir. Özünü məhsuldar qələm adamlarından biri sayır. Şeir yazmadığı vaxtlarda da bekar qalmır, müxtəlif adamlardan müsahibələr götürür, rəngarəng məqalələr ərsəyə gətirir. Otuzdan çox məqalələri, əllidən çox müsahibələri var.  Jurnalistikanı çox sevir. Filoloq kimi uzun illər Biləsuvar rayonunun  Bağbanlar kəndi şəhid Aydın Həsənov adına  orta məktəbinin direktoru olmuş Babası Asif Cəfərovun, ( onu da ələlxüsus da vurğulayaq ki, Bağbanlar kəndində orta məktəbə şəhid Aydın Həsənovun adını Asif müəllim direktor olduğu müddətdə vermişdi.) Jurnalist kimi əmiləri "Qızıl qələm" mükafatçısı, Malik Cəfərovun, "Tərəqqi medallı" Mirzə Müşfiqin, əmisi oğlu, Respublika qəzetində məsul vəzifələrdən birini daşıyan Müşviq Mirzənin, şair kimi mənəvi babası, ustadı dahi Dəmir Gədəbəylinin davamçısıyam deyir. Peşəkar jurnalist kimi " Hürriyyət" qəzetində püxtələşib.

Atasızlıq onun üçün dözülməz bir dərddi. Atası yadına düşəndə isə göz yaşlarını saxlaya bilmir, bulud kimi dolub boşalır. Gənc şairin atasının əziz xatirəsinə ithaf etdiyi bu şeirinə kövrəlməmək mümkün deyil.

                                                                   Atamın məzarda ruhu üşüyür!

                                                                    Bir qarışqa, böcək əzməyən kəsin,
                                                                    Saysız dərdlərindən bezməyən kəsin.
                                                                    Sağ ikən soyuğa dözməyən kəsin,
                                                                    Atamın məzarda ruhu üşüyür!

                                                                    Həmişəki kimi solğun olsa da,
                                                                    Yorulub yatsa da, yorğun olsa da.

                                                                    Çiçəklər üstündə yorğan olsa da,

                                                                     Atamın məzarda ruhu üşüyür!

                                                                   Çox erkən əcəlin atına minən,
                                                                   Qırx yeddi yaşında çırağı sönən.
                                                                   Torpağa qarışıb, torpağa dönən,
                                                                   Atamın məzarda ruhu üşüyür!

                                                                   Qucağa almadı bir nəvə payı,
                                                                   Doyunca görmədi baharı, yayı.
                                                                   Tez dəydi köksündən fələyin yayı,
                                                                    Atamın məzarda ruhu üşüyür!

Gənc şair dostumuzun başqa şeirlərini oxuyanda bir cəhəti də çox xoşuma gəldi ki, bir şair kimi özünü təkrarlamır. Buna bariz nümunə olaraq, iki şeirini də oxucularımızın nəzərinə çatdırmaq istəyirəm. 

                                                                                   Döz! Düzələcək!

                                                                    Sənə çox dedilər dostlar, tanışlar:
                                                                  “Az qalıb... Bu dünya döz, düzələcək.
                                                                   Bir az səbirli ol, bir az toxdaq ol,
                                                                   Çölləri, düzləri gəz, düzələcək...” 

                                                                   Fikirdən ürəyim yanan bir kürə,
                                                                   Dərdim axıb getmir araza, kürə.
                                                                   Dedilər, qələmi sən qoyma yerə,
                                                                   Yorulmaq bilmədən yaz, düzələcək.

                                                                   Fələk hər vaxt mənə qəmdən don biçir,
                                                                   İmtahan etməyə hey məni seçir.
                                                                   Çox da ömrüm-günüm qış kimi keçir,
                                                                   Dedilər: “gələcək yaz, düzələcək.

                                                                  Heç nəyin dərdini gəl çəkmə sən də,

                                                                  Qəlbini eyləmə hey kündə-kündə.
                                                                  Yalanla başını qataraq gündə
                                                                  Alsan bu dünyadan həzz, düzələcək!”

                                                                         Yetər, bacım, yetər, döz...

                                                                           Bu həsrət də bir anlıq,
                                                                           Bitər, bacım, bitər,döz.
                                                                           Qəribanlıq, tənhalıq,
                                                                           Ötər, bacım, ötər, döz.

                                                                           Geri dönər itənin,
                                                                           Toya dönər matəmin.
                                                                           Sonu çatar sitəmin,
                                                                           Gedər, bacım, gedər, döz.

                                                                           Yaza dönər soyuq qış,
                                                                           Ötüb keçər qar - yağış.
                                                                           O həsrətli, bir baxış,
                                                                           İtər, bacım, itər, döz.

                                                                          Gələr sevinc zamanı,
                                                                          Eh, neynirsən ad - sanı?
                                                                          Dünya fani, nə fani!
                                                                          Betər, bacım, betər, döz.

                                                                          Pozma qəlbdə nizamı,
                                                                         Almazsan ki, sən kamı.
                                                                         Dəli edir adamı,
                                                                        Kədər, bacım, kədər, döz.

                                                                        Lətafətli gül olsan,
                                                                       Eşq yolunda kül olsan.
                                                                       Məhəbbətə qul olsan,
                                                                       Hədər, bacım, hədər, döz.

                                                                      Sən unutma yarını,
                                                                      Dərəcəksən barını.
                                                                      Həyat, aldıqlarını,
                                                                     Ödər, bacım, ödər döz.

                                                                      Dünyaya açsan qucaq,
                                                                      Sönə bilməz od- ocaq!
                                                                      Hər şey yaxşı olacaq,
                                                                      Yetər, bacım, yetər, döz...

                                                                           Asan olmuşam...

                                                             Mənim kövrəkliyim sıxır özümü,
                                                             Ən xırda bir sözdən küsən olmuşam.
                                                             Hər dosta, qardaşa səmimi insan,
                                                             Hər kəsin üstündə əsən olmuşam.

                                                             İçimdə od tutub yanmışam daha...
                                                             Beləcə kül olub sönmüşəm daha.
                                                             Vaxtında susmayıb dinmişəm, daha,
                                                             Gördüyüm çox şeyə susan olmuşam.

                                                             Yoluma qayalar salanlar olub,
                                                            Qarşımda nə qədər ilanlar olub...
                                                            Gözümün odunu alanlar alıb,
                                                           Özümü bir küncə qısan olmuşam.

                                                             Fuadam, yaşaram ömrü birtəhər,
                                                             Sıxır boğazımı əl kimi qəhər.
                                                             Düzümə şər qatan, balıma zəhər -
                                                            Çətin insanlara asan olmuşam...

                                                            Müəllif: Fuad Biləsuvarlı

Lirik, kövrək mahnıları dinləməkdən zövq alır. Özü də hərdən, ara-sıra vaxt olanda lirik mahnılar yazır. Daha çox Alim Qasımovun, Fərqanə Qasımovanın, Gülüstan Əliyevanın, Mənsum İbrahimovun, Mətanət İsgəndərlinin, Gülyaz- Gülyanaq bacılarının, Nüşabə Ələsgərlinin, Məhəbbət Kazımovun, Flora Kərimovanın, Zeynəb Xanlarovanın, Elçin Cəlilovun, Akif İslamzadənin ifalarına üstünlük verir. Emin Sabitoğlunun bəstələdiyi bütün mahnıları isə sevə-sevə dinləyir... Özü demişkən, yaxşı, xoşu gələn sənətkarlar çoxdu. Bəziləri yaddan çıxa bilər. Üzrlü saysınlar. 

Fuadın yaradıcılığında ölməz şairimiz Mikayıl Müşviqin ölməz xatirəsinə ithaf etdiyi Müşviq və Dilbər adlı mənzum dramı da diqqətimi çox çəkmişdi. Hətta Fuada o vaxt dedim ki, irili - xırdalı bu mənzum dramını teatrlarımıza göstər.

“Göydə Allahdan, yerdə qıldığım namazdan, oxuduğum dini kitablardan, doğmalarımdan, əzizlərimdən güc, qüvvət alıram. Allahın lütfüdür ki, bu istedadı mənə bəxş edib. Doğrudur, bəstəkar Vüsalə Hikmətlə mahnı yaradıcılığına başladım və gözəl nəğmələr yazdıq. Ancaq məni ən çox tanıtdıran dostum, "Əməkdar incəsənət xadimi" Nadir Əzimovla işbirliyimiz olub...”- söyləyir.

Haqqında söhbət açdığım şair-jurnalist Fuad Biləsuvarlı 1989-cu ildə Biləsuvar rayonunun Bağbanlar kəndində dünyaya göz açıb. Böyüklərinin dediyinə görə, doğulduğu gün- ilaxır çərşənbə bayramına təsadüf edib. 2007-ci ildə də orta təhsilini doğma kəndində başa vurub. Sonra Bakıya üz tutaraq Təfəkkür Universitetinin Filologiya fakültəsinə daxil olub. Oranı uğurla bitirərək, filoloq ixtisasına yiyələnib. Azərbaycan Yazıçılar və Jurnalistlər birliklərinin üzvüdür. Bir il Prezident təqaüdü alıb. Daha çox lirik məhəbbət şeirləri ilə tanınır. 

Bu günədək bir sıra tanınan bəstəkarlar onun müxtəlif şeirlərinə mahnılar bəstələyiblər. Tanınmış müğənnilərdən Alim - Fərqanə Qasımovların, Brilliant Dadaşovanın, Gülyaz Məmmədovanın Gülyanaq Məmmədovanın,  Gülüstan Əliyevanın, Nüşabə Ələsgərlinin, Ağadadaş Ağayevin, Almaz Ələsgərlinin, Mətanət İsgəndərlinin, İlahə Fədanın, Elnarə Xəlilovanın, Vasif Şahbazovun, və başqalarının ifasında dinlədiyimiz mahnıların bəzilərinin sözlərini, bu nəğməkar şair qələmə alıb. İlk dəfə onun sözlərinə bəstələnən "Sənsən günahkar" adlı mahnısını isə Xatirə İslam oxuyub...  Sonra həmin mahnını Gülüstan Əliyeva da oxuyub. 

Deyir ki,- “Qarabağımızın gözü- Şuşamızın azadlığına yazdığım “Qarabağ- Şuşa" əsəri sevimli xalq artisti Brilliant Dadaşovanın ifasında necə də gözəl alınıb, bunu hamı bilir. Hələ Nadir Əzimovla nə qədər işıq üzü görməmiş mahnılarımız var. Sonra bəstəkar dostum Natiq Qəzənfəroğlu ilə Hacı Şahin haqqında gözəl kompozisiya hazırladıq. Səhnəmizin sərkərdəsi, Xalq artisti, şöhrət, şərəf ordenli Rasim Balayev kimi sənətkar o şeirimi qiraət etdi. Kompozisiya" Haqqın oğlu" adlanır. Bəzi adamlar deyir ki, əşşi sənin hansı işlərin var ki, özündən belə razısan? Bu yaşımadək nə iş görmüşəmsə, hər şey göz qabağındadır. Göydə Allah, yerdə insanlar buna şahiddir...”

Filologiya üzrə fəlsəfə doktoru, yazıçı-jurnalist Zemfira Məhərrəmli onu belə xarakterizə edir;- “İstedadlı gənc şair, Azərbaycan Yazıçılar və Jurnalistlər birliklərinin üzvü, Prezident mükafatçısı Fuad Biləsuvarlı ölkədə daha çox nəğməkar şair kimi tanınır. Ərsəyə gətirdiyi oxunaqlı, diləyatımlı nəzm nümunələri tez bir zamanda diqqəti cəlb edib, bəstəkarlar bu şeirlərə mahnılar bəstələyiblər. Bu gün radio dalğalarında, televiziya ekranlarında tanınmış sənətkarların ifasında dinlədiyimiz neçə sevilən mahnının sözləri bu nəğməkar şairə məxsusdur. Fuadın poetik əhval-ruhiyyəsinin inikası olan neçə-neçə şeiri həm də Vətən sevgisindən boylanır. Bu poeziyada bəzən tünd rənglər, uzun illər qəlbimizə hakim kəsilən, taleyimizə həkk olunan ağrılı mövzular da nəzərə çarpır...”

Fuad Biləsuvarlı həm də jurnalistika sahəsində fəaldı. Uzun illər "Hürriyyət" qəzetində jurnalist kimi fəaliyyət göstərib. İndi də " Qafqaz.Media" xəbər agentliyinin redaktoru, Stopnarkotik.az saytında müxbir kimi çalışır. 

Martın 15-i Fuad Biləsuvarlının 35 yaşı tamam olur. Onu bu münasibətlə təbrik edir, yaradıcılıq uğurları arzulayıram.

İnanın, vaxt gələcək ki, özünə təxəllüs götürdüyü ata-baba yurdu Biləsuvarın adı, öz adıyla yanaşı tez-tez sadalanacaq və ölkədə sevildikcə, bütün biləsuvarlılar da onunla fəxr edəcəklər... 

Uğurlar, Fuad Biləsuvarlı!

Hörmətlə, Elman Eldaroğlu

Moderator.az

https://youtube.com/@FuadBilesuvarli?si=sVu1uvASCZdqEjaw