Keçmiş məmurlar hakimiyyəti Saakaşvilini müalicə üçün xaricə göndərməyə çağırdılar – 130 NƏFƏRİN İMZASI İLƏ MÜRACİƏT YAYILDI
Gürcüstanda 130 nəfərdən çox keçmiş yüksək vəzifəli məmur hakimiyyəti eks-prezident Mixail Saakaşvilini müalicə üçün xaricə aparmağa çağırıb.
Qafqaz.media Gürcüstan KİV-lərinə istinadən xəbər verir ki, ölkənin dördüncü prezidenti Giorgi Marqvelaşvili də daxil olmaqla, keçmiş məmurlar bu barədə müraciət qəbul ediblər.
Müraciətdə deyilir ki, sabiq prezident Saakaşvilinin Gürcüstanda işgəncədən ölməsinin son dərəcə zərərli daxili və xarici siyasi nəticələri olacaq.
Onların fikrincə, ölümcül nəticə ölkədə mövcud qütbləşməni dərinləşdirməklə yanaşı, yaxın gələcəkdə onu aradan qaldırmaq şansını da məhv edəcək.
“Biz prezident Saakaşvilinin günahını müzakirə etmirik. Biz deyirik ki, ölüm hökmü Konstitusiya ilə, eləcə də işgəncə, qeyri-insani və ləyaqəti alçaldan rəftarla qadağandır. Bu, həm də Gürcüstanın tanıdığı beynəlxalq normalardan irəli gəlir. Prezident Saakaşvilinin işgəncə ilə öldürülməsi cinayətdir və Gürcüstanın üzərinə götürdüyü beynəlxalq öhdəliklərə ziddir. Bundan əlavə, prezident Saakaşvili hökumətin effektiv nəzarəti altında olduğundan onun ləyaqətinə, həyatına və sağlamlığına qəsd edilməsinə görə məsuliyyət dövlət orqanlarının üzərinə düşür.
Prezident Saakaşvilinin işgəncədən ölməsinin Gürcüstanda son dərəcə zərərli daxili və xarici siyasi nəticələri olacaq. Ölümcül nəticə nəinki ölkədə mövcud qütbləşməni gücləndirəcək, həm də yaxın gələcəkdə onu aradan qaldırmaq şansını məhv edəcək.
Və nəhayət, bu gün Avropada tarixi bir proses - Ukrayna xalqının Rusiya təcavüzünə qarşı qəhrəmancasına mübarizəsi gedir. Əgər Gürcüstan dövləti bu tarixi günlərdə Putinin “şəxsi düşməni” Mixail Saakaşvilini həbsxanada işgəncə ilə öldürsə, bizə qarşı tarixi hökm necə olacaq?”, - müraciətdə qeyd olunur.
Qafqaz.media
