Nazir: İxtisas hazırlıqlarında yaşıl səriştələr nəzərə alınmalıdır, bu istiqamətdə işləri davam etdirəcəyik

İxtisas hazırlıqlarında "yaşıl" səriştələr nəzərə alınmalıdır və biz bununla bağlı işlərimizi davam etdirəcəyik. APA xəbər verir ki, bunu elm və təhsil naziri Emin Əmrullayev jurnalistlərə açıqlamasında deyib. O bildirib ki, həm ətraf-mühit təhsili, həm də ətraf-mühitlə bağlı olan ixtisaslar “yaşıl" peşələr məsələsidir: "Yaşıl peşə"lər dəyəndə, bəzən sual verirlər ki, təzə ixtisaslar açılacaq? Xeyr. Ətraf-mühit məsələsi mühəndislik turizm, mədən işi, müəllimlik kimi digər ixtisasların içində olmalıdır”. Nazir xatırladıb ki, Azərbaycanın təhsil məzmununda "Həyat bilgisi" dərsində və s. yaşıl təhsillə bağlı müəyyən məqamlar var: “Daha qlobal məqamda danışsaq, mütləq iki məsələni qeyd etməyim yerinə düşər. Biri, bilirsiniz ki, noyabrın 18-i COP29 çərçivəsində keçiriləcək "Ətraf-mühit savadlılığı çərçivəsi"nin hazırlanmasıdır. Bu, Azərbaycanın UNESCO və İqtisadi İnkişaf və Əməkdaşlıq Təşkilatının birgə təşəbbüsü ilə hazırlanıb”. “Nəinki Azərbaycanda, hələ heç dünyada ətraf-mühit təhsilinin və ya savadlılığının ölçmə çərçivəsi yoxdur. Bu hazırlanır və mən inanıram ki, 2029-cu ildə bütün ölkələr buna qoşulacaq və biz burda kifayət qədər ciddi nəticələr görəcəyik", - deyə nazir vurğulayıb.